Luzern:
Früeh am Morgä… oder isches no Nacht, wemmer nie isch go schlafe? Egal… Also früeh am Morge simmer go zMorgä esse oder Gipfeli chaufe. Aber es hed au serig gäh wo eifach wiiter gschlafe hend. Sells gäh, cha passiere… isch gliich nid so läääääss.
Wo sich denn alli im Car iigfunde hend simmer loosgfahre in Richtig Ungwüssheit. Au dasmal simmer uufgregt gsii willmer nid gwüsst hend wohi dases gad.
Aber womer de z’Luzern aacho sind… uiuiui… so schüch han ich üsi Gnomäschaar nonie gseh. Ganz zögerlich hedmer sich üsne Gastgäber de Chappelgnome gnöchered.
S’Konzert zmitzt ide Gass hed de doch d’Stimmig recht guet uufglockered. Nachdem mer üsi Instrument vor de falsche Tor abgstellt hend und gwartet hend bis mer hend döffe uf de Ratshuusstäge spile hemmer üs nochli vom Vorabig erholt.
Jetzt ischs so wiit, ab uf d’Stäge. Läck hed das vill Lüüt. D’Chnüü hend scho bitzli zittered. Aber schlussendlich heds riiiiiiiisig Freud gmacht und mier hends richtig gnossä.
Sogar eis zwei Trändli sind gflossä ob im Publikum oder bide Mitgliider. Anschiinend siigemer bis uf England live verfolgt worde.
Nach dem supertolle Uuftritt hemmer de doch wider müesse für die Iiheimische Guuggäne Platz mach und hend üs zu üsem Materialdepot zruggzogä.
Ziit hemmer üs mit Essä, dumm Schnorrä und Guuggä losä vertribä. Wo denn tuusig Bäss verbiigloffe sind hend sich üsi Sousis au nümm chönne zruggha und sind churzer Hand mitgloffe.
Scho bald isches Ziit gsii in Car iizstigä.
Die wo hend welle sind no z’Luzern blibä und die andere sind richtig Schwyz,Brunne,Ibach und Seewen. Oder isches gliich Brunne, Ibach, Schwyz und Seewen gsii… Ja de Komet Surer heds nid so gha mit de Route. Aber hei simmer de trotz allem doch no cho.
Also de Samstig isch auf Rüüdig gsii ohni Rüüdiger und es hed richtig Spass gmacht, danke ade Organisatore für das tolle Erläbnis.
I dem Sinn, figg di öööbb und tschüss bis niemeh.
