GuuggeMusig Muota Gnomä | GüMo Ibach, 2016
9198
post-template-default,single,single-post,postid-9198,single-format-standard,ajax_fade,page_not_loaded,boxed,,qode-title-hidden,qode_grid_1300,footer_responsive_adv,qode-content-sidebar-responsive,qode-theme-ver-17.0,qode-theme-bridge,qode_header_in_grid

GüMo Ibach, 2016

Häi de Tag hed ja guet aagfange, de Major heig verschlafe. Aber was isch denn das det für eine? Jaja schön ufe Arm gnoh heder üs üse lieb Major. Vollmaskiert heder sich welle id Meuti schmuggle. Mer hends denn aber gleitig gmerkt.

Standartmässig simmer mitm «Haue de Schniider» richtig Muotaschuelhuus zogä. Läck das Jahr simmer gad echli vill Lüüt gsii. A dere Stell danke vill mal allne Uusswärtige wo mit üs de GüMo verbracht hend und üs musikalisch unterstützt hend.

A Verkleidige heds das Jahr au wider mal nid gmangled. Es ganzes Mario Game isch ume gsii. Mario und Luigi, Yoshi und sogar de Wario isch debii gsii. En König und sind Untertan de Wickinger (oder ischs ächt doch en Flying Hirsch gsii). Fischer mitm Fang des Lebens. Üsi Susis sind im Nightfever gsii und sogar d’Langlauflegände Luca hemmer debii gha. De hed sogar sin Wachsmeister und Manager i eim mitgno. Wie jedes Jahr hemmer wider d’Gsellschaft vo villne verschidene Tier döffe gnüsse.

Zrugg zude Routä. Bim Muota aacho hemmer es chliises uufweckkonzertli gha und sind nacher Richtig Zmorge, bim Gasser, gloffe. Feini Würscht und super Kaffee hemmer det döffe gnüsse. Nach  dere Stärchig isches wiiter gane. Bim Begägnigsplätzli hemmer es VIP-Konzert füre Stefänel gäh. Ja er isch ja au de einzig gsii. 😉 Durezogä hemmers gliich. Bide Schriineri Martin Steiner, also bim Pfüsi simmer mit chöschtlichä Canapés verwöhnt worde und hend üs chönne uufwärme. Am König isch en Zopf gflochtä worde und verusse hed d’Sektion Mario Sterne gsammled und sind wie die wilde hin und her gsprunge. Au da hemmer es dankbars Konzertli gäh bevormer wiiter gwatschled sind und de Pfüsi hed wie i alte Ziiti mit pauknet. Nächsti Station Latino. Det hemmer vonnere wunderbare Bowle dörfe chostä und eifach nochli höcklä. Nachdem üs üse Major churz d’Levitä gläse hed simmer de zum Plätzli füre gwatschled. Bim Plätzli aacho hemmer nid schlächt gstuuned. Sooo vill Lüüt heds gha und d’Motivation hed rasant zuegnoh. Danke allne wo mitgsungä und mittänzled hend. Scho isches Ziit fürs Zmittag gsii. Das hemmer dörfe ide Bäckeri Schwegler i Form vom beste Chäschuechä vode Welt zue üs näh. Jedes mal en Gaumeschmaus. Mit volle Büüch isches denn wiiter gange. Bim Dannys hemmer d’Sunne gnosse, Füäss iibunde oder die nüscht Eroberig uusgfahre. Routeänderig übere Hofrain is Pfarrheim. Wieso, hemmer denn bim Hang au gmerkt. Üsi Langlauflegände hed eisch so richtig welle Geze gäh. Zackig ischer gsii. Troled ischer aber au. Aber Unterhaltig puur, danke Luca. Bim Pfarrheim hemmer uf, näb und ob de Stäge es Ständli gäh und sind nachher wiiter i Gerbihof hindere. Det hemmer wie jedes Jahr bitzeli Föteli gmacht und hend üs au det mit Kaffee, Bier oder eifach Mineral la verwöhne. Bevor mer de hend chönne spile hemmer no schnell de Orangewage chli weggstosse. Scho bald heds gheisse ab zur zweitletschte Station vo hütt. Chrüz, Brüggli oder Gnomäbar isch Destination gsii. Bevor mer hend chönne üses aller letschte Konzertli gäh für die Fasnacht hemmer üs Ziit mitm Pippi Langstrupf Soundtrack verkürzt. Gwüssi hend gmeint mer luegi nid zue und hend gad no es Tänzli anegschmättered. Denn heds gheisse ab as Abschlusskonzert. Alles hemmer gäh für üse Major. Mier wennd ne ja schliessli stolz mache. Leider gad jedi Fasnacht z’End. Träne sind gloffe und mehr isch mit schwerem Härze s’Instrument go versorgä.

Für die wo nonig ganz gnueg gha hend isches ide Gnomäbar wiiter gange. D’Erle hedmer no parad gmacht füre Abriss und es paar hedmer sogar no z’Schwyz aatroffe. (Ob umzoge,abzogä oder überzogä)

Liebi Gnomä ich danke üch 1000 Mal für die super tolli Fasnacht und mit schwerem Härze sägi für die Fasnacht es letscht Mal.

Tschüss bis niemeh

üches Brini