GuuggeMusig Muota Gnomä | Böögge Brätschete, Welschenrohr
10604
post-template-default,single,single-post,postid-10604,single-format-standard,ajax_fade,page_not_loaded,boxed,,qode-title-hidden,qode_grid_1300,footer_responsive_adv,qode-content-sidebar-responsive,qode-theme-ver-17.0,qode-theme-bridge,qode_header_in_grid

Böögge Brätschete, Welschenrohr

14:00 s’Schminkteam stahd bereit. Jetzt heissts Grinde schminkä, dumm schnorrä und lache. Überpünktlich simmer fertig gsii. No schnell de Major zum Näscht us lüütä und loos gads. Hütt hemmer no öpis z’erledigä bevor mer abfahred. Mier hend üs in Stellig bracht für üse Biitrag ad Mannequin Challenge. Ob im Gepäckfach schlafe, im Laderuum schmuusä oder ufem WC en Reisefüehrer läse jede hed sin Platz gfunde. De Major hed sini Arbet als Kameramaa (Bruno?) super gmacht und es tolls Video heds gäh. Denn heds aber gheisse abfahre susch chömemer z’spat. De Touri isch scho mit vorwurfsvollem Blick bim Car gstande und hed uf sini Uhr zeigt. 😉 Uf de Fahrt hemmer üs vo wunderschöne Flötäkläng la berislä und Cantina Band hed üs au no es Ziitli d’Ehr erwisä.

Am Fest aacho isch scho wider Schminki uuspackt worde. No schnell vorem Platzkonzert de Major schminke isch keis Problem! Wenn da nur nid die Kamikaze-Carfahrer wäred wo üs vo eim Egge zum andere gschücht hend. De VIP-Bereich isch sehr beliebt gsii. Halt eifach vo unne, will ufe hemmer de doch nid döffe. D’Simba hed denn allne zur Beruhigig Gschichtli vorgläse ufem Schaukelstuehl und hed somit am Samichlaus de Platz vorgwärmt. Nachem Platzkonzert en Wurscht go hole und s’Feschtgländ erkunde. Kaffeehütte hemmer schnell eisch gfunde. Leider heds kei Holunderwii gäh und mier sind de doch nid inegsässe. Olympischi Diszipline sind uusgfüehrt worde und bitzli Zirkus hemmer au no gmacht. Wemmer en Flying Hirsch bstellt hed, heds gad es ganzes RedBull Dösli gäh. Tja was machemer jetzt mit dem? Ganz klar, no meh Jägermeister! De Sässellift hed üs alli fasziniert, aber ufegsässe isch de doch niemer.

21:30, ui scho wider so „spat“, üse Uuftritt staht bevor. Lüüchtschueh montiert und ab uf d’Bühni. Uf de Bühni hemmer Vollgas gäh. Momänt mal, was isch denn das für eine im Publikum? De ghört doch zu üs! (Aber isch glaub besser gsii ischer im Publikum gstande. Mitere kaputtä Posune spillts sich nid so guet. Wie das passiert isch weiss glaub au niemer.  😛 ) Währed üsem Uuftritt hemmer vill bekannti Gsichter im Publikum gseh. Danke vill mal Mythechroser für üche tolli Support. 😀

Zrugg zum Fäscht: Kaffeestube hemmer glich no bsetzt und hends üs, mit ab und zue chli Musig, bequem gmacht. Mit chli Verspätig isch de Mythechroser ihre Uuftritt immer nöcher cho. Wie heisst so schön? WIE DU MIR, SO ICH DIR! Ganz nach dem Grundsatz hemmer üs vor de Bühni versammled und hend mitgschunkled und gsungä. En Bolonääs isch aazettlet worde und en Pyramide hemmer au no z’stand bracht. (meh oder weniger)

Scho glii heds denn für Gnomäschar gheisse: Zrugg id Heimet. Hemmer öpis vergässe? Eini fählt! Wo isch sii wo? !Ha! abgäh hemmersi sellet sich doch d’Mythechroser mitere umäschlah. 😆 Neinei, so simmer de scho nid, sii hed das ganz elleige entschide. 😉  Carfahrt isch erfüllt gsii vo meh oder weniger intellektuelle Gspräch und irgendwenn hends au mier bis zum Gerbi gschafft.

Schönebüechler Chilbi isch Trumpf… oder au nid. Und so isch wider mal es Fäscht z’End gange, für die einte früehner und die andere chli später.

En schöni und besinndlichi Wiehnachtsziit wünsch ich üch und mier gsehnd üs im Januar wider.

Tschüss bis niemeh üches Brini