GuuggeMusig Muota Gnomä | SchmuDo
8926
post-template-default,single,single-post,postid-8926,single-format-standard,ajax_fade,page_not_loaded,boxed,,qode-title-hidden,qode_grid_1300,footer_responsive_adv,qode-content-sidebar-responsive,qode-theme-ver-17.0,qode-theme-bridge,qode_header_in_grid

SchmuDo

03:00 s’Schminkteam stad parad und die erste sind scho iitrudled. Ob deheime usem warme Bett oder direkt mitm Taxi vo Brunne. All komplett? Momänt, d’Angie fehlt. Churzer Hand hedmer ihre aaglütä. Oder äbe doch nid. Aber de Chrigu vo Bern hed sich über das Telefonat i aller hergotts Frühe, sicher au gfreut. Er hed üs amel en schöni Fasnacht gwünscht.

05:00 Urknall… und ab isch gange mitm Haue de Schniider, Richtig Muota Garage. Feins Kaffee oder eifach nur es Mineral hemmer üs da gönnt. Wie jedes Jahr hemmer wider Understützig gha vom Scholi. Wemmer kei Hobbys hed und nid gäre schlaft chamer das scho mache. 😉 Scho glii heds gheisse wiiter gats und mier hend üs nacheme churze Konzertli wider ufd Sockä gmacht. Via Laimgass, also ja det de Stutz duruf, simmer zudä nächste Station pilgered. Häi hed das Verchehr gha. Halte, uuswiichä, laufe, halte…Dankeschön a fründliche Autofahrer wo uf d’Siite gange sind spilä…halte und so wiiter. Es hed sogar richtigi Verchehrsraudis gha, läck gad echli es Tempo hends druff gha. Bim Strüby Schnaps aacho heds denn Zmorgä gäh. En super feini Gerstesuppe hemmer übercho, aber ACHTUNG, hed Speck dinne. Brunne isch doch kei gueti Idee gsii hend sich gwüssi dänkt. Hend en Techi gsuecht und nah es Erläbnispfüüsi grisse. Schlafen im Schnaps ahoi… Wo denn all wider gstärcht gsii sind und uusgschlafe, heds üs richtig Schwyz zoge. Übere Grossstei, und denn ade Schützestrass entlang simmer amene bekannte Gsicht vercho. Hallo Angie, da bisch ja. 😉 Aber zrugg zu Schwyz. Mier hend de SchmuDo nämmlich es ganz speziells Programm. Dank üsem Ehrepresi em Peppe, wo üs zumnä Kaffee oder zwee ide Tüüfgarage iiglade hend hemmer das Jahr döffe ufem Hauptplatz spilä. Das hemmer denn au gmacht und hend riisig Freud gha hend üs d’Lüt zuegluegt und mit tänzled. Üses Susiregister hed sich en Ehreplatz gschnapped und hed vode «Empore» obenabe gspillt. Hed gad nochli gfägt. Nacheme churze Konzertli mit Platzwechsel hemmer de no schnell zeigt vo wo dasmer sind. «Ibach ist ne schöne Stadt…» Denn simmer wider ade Hauptstrass entlang uf Ibach gloffä. D’Simba und de Mäitscher hend gekonnt de Verchehr gregled. Bim Mythecenter-Chreisel hend üsi Susis sich traditionell in Szenä gsetzt. Ufem Begägnigsplatz hed de Gallärä wider en super Arbet gleistet und üs vo vorne bis hinne verwöhnt. Scho balt isches Ziit gsii richtig Rose hindere z’laufe. D’Büüch hend langsam afe chnurre und es isch Ziit fürs Zmittag gsii. Aber halt, vorher mömmer da no üses nüüe Gwändli so richtig in Szenä sezte und eis zwei Föteli mache. Ide Rose simmer denn alli satt worde. Ja guet hed au sörig gäh wos s’Zmittag verschlafe hend. Aber die meiste sind satt worde. Nachem Zmittag hemmer döffe bim Fantasy Tours Wiili trinkä und chli verdaue. Um 180 Grad cherä und ab zum Altersheim. Det simmer ufd Rott troffä und es hed au für üs es Zückerli, Mutschli oder en Wurscht gä. Im Orangewage schlafe isch Trumpf und wer es Bett debii hed isch weich. Uuuuupsi was isch denn das, de Lifzger hed hes Rad ab. Er isch denn aber doch irgendwie zum Chileplatz cho. Det hemmer es chliises Konzertli gha und vill vill Publikum. Danke Ibach für das zahlriichä Erschiinä. Im Pfarrheim hemmer üs denn no eis zwei Kaffe gönnt. «S’Mami hed gseid ich müess Löffeli mitnäh mier heiged keini meh dehei.» Tja, so chas gah. Bim Konzert im Pfarrheim hend gwüssni alti Ziitä la uufläbe und wider mal Pauke gspilt. Ab is Chrüter Chrüz oder äbe is Brüggli. Gwüssni sind sogar im Portugiese Restaurant glandet aber überall hemmers guet gha und hend eis zwei spendiert becho. Danke üsnä Wirtä und Wirtinnä. Abschlusskonzert Chileplatz. Üse Mäitscher hed au wider mal mitgspilt und es isch richtig schön gsii.Üsem Geburtstags-Tsching hemmer denn no en Traum erfüllt und hend nä sprachlos gmacht. Happy Birthday Marco…

Am Abig heds die einte uf Brunne, die andere uf Schwyz zoge und gwüssni sind denn halt au eifach im Pfarrheim Ibach verhocked. Am Morge am 6i hend sich denn au die letschte entschide Hei zgha.

Mier lueged ufne glungnä und luschtigä SchmuDo zrugg. Danke allne Kaffeegönner und suschtigä Unterhalter. Bis glii wider

Tschüss bis niemeh

Brini