Ja,… s’ChäFer!
Was seid mer zumene Fescht wo eim am Mäntig no ide Chnochä steckt.
!Achtung! en Dorffasnacht. Alles dusse nass und gruusig. Ungefähr so hemmer üs ChäFer 2018 vorgstellt. Cho isches denn glaub für die meiste ganz anderst. Also nass und gruusig isches ja scho gsii… aber alles andere hed glaub nid schlächt gstumme. Wenn denn mal alli en Bönner hend chönntmer öpis go ässe heds gheisse. Womer de aber bim Essstand gsii sind, heds de doch no nüd gäh. Mit leerem Mage spillts sich nid so guet. Aber trotzdem hemmer denn döffe üsi Instrument fassä und füre Umzug iistah. D’Umzuugsroutä isch nid sooooo schwirig gsii und nach zwei mal ablaufe isches denn au scho wider verbii gsii. Instrument versorgä und im Dorf verteile. Ässe, tanze, Restaurant unsicher mache…hoplahüh schowider Instrument holä. Uuftritt… läuft. Bim Schilter ab de Bühni go Bier hole isch nid jedem gäh. Vorallem s’pünktliche Retoursii… Nachem Uuftritt simmer zrugg zum Instrumentedepot. Guntä sind gfährlich… oder eifach nass. Aber hey, sorry weni en Highlander bin!!!
Nacheme churze Uufenthalt am Fescht hemmer denn üse letschti Uuftritt au no bewältiged.
So, wenn gömmer häi? Sind die zwei uf de Bar vo üs? Wieso isch de «Schaukelwage» zue? Wo heds susch no WC’s? Vo wo hesch du das Winetou? Wemmer wirklich mitm Car hei? Was macht das Töffli da obä…? Fragä über Frage.
Häi simmer am 3, also die meiste zumindest. De Car isch sicher denn gfahre. De Rest isch de halt blibä…s’Fest isch ja au no i vollem Gange gsii.
Wo de die letschte au no is Bett gfunde hend, isch scho fascht wider Zmittagsziit gsii.
Tja…mängisch laufts halt eifach.
Danke vill mal Arvi Hyler für d’Iiladig und das tolle Dorffeschtli.
I dem Sinn, tschüss bis niemeh
üches Brini
