GuuggeMusig Muota Gnomä | Gnomä Tag 2014
3242
post-template-default,single,single-post,postid-3242,single-format-standard,ajax_fade,page_not_loaded,boxed,,qode-title-hidden,qode_grid_1300,footer_responsive_adv,qode-content-sidebar-responsive,qode-theme-ver-17.0,qode-theme-bridge,qode_header_in_grid

Gnomä Tag 2014

Gnomätag der Erste

Ja, akündt wordä isch de Tag scho lang. D`Fragä sind immer meh und meh wordä was ufm Programm stahd, wemer sich scho am Mittag im Gnomäshirt z`Ibach träffä tuäd.

Ei Tag vorhär sind de diä userkohränä, bzw usgwürflätä Grupäächefs informiärt wordä, was ihnä bevor stahd und welli tapfärä Kompadres uf ihrer siitä stönd. Je nach Gruppä siigid vorbereitigä sehr hecktisch zuä und här gangä, damit au ja alli guät vorbereitet uftauchä täged.

So heds sichs ergäh, dass sich am Samstig 27. Septämber, 21 topmotiviärti Gnominnä und Gnomä pünktlich als Arschpiratä verkleidet umä Käptn` Philip, Puderosa Ranch Gang bim Bätschert der Süsse, d`Village People um de Häuptling Martina und d`Crew vom Traumschiff Surprise um d`Cheyenne versammled hed. Guät heds usgseh diä villä buntä und farbigä Gnomä wo us allnä Eggä und nid wenig vom andärä Ufer här cho sind. Sogar de Petrus hed sich als Fan vodä verkleidätä goutet und sich mit Sunnäschiin undämä schönä Herbschttag bedankt.

Ganzi Sibä Pöschtä sind ufm Programm gstandä, doch keinä heds rosä Handtäschli wellä früähziitig rüährä und so ischs für all Viär Gruppänä i underschidlichä Reihäfolgänä losgangä. Däbii hed sichs Chnüütünkä idä Muota no als eifachschti Ufgab usägstellt. Bim filmischä dokumentiärä vomnä Ructus Patulis Gigantus im Zältmagazin, heds de scho einigi gschmacklichi Problem gäh. Näbem lockärä wandärä quär durä Talchessel hends de au no ds sportlichä Potential im Kollegi usgläbt und sind de midämä stärchigs Trunk belohnt wordä. Eini vodä gröschtä Ufgabä hed ds Nelly vodä Hofmatt grad persönlich gstellt. Doch diä Fragä sind all beantwortät wordä, wobii sichr ds Nelly sälber de gröschti Plausch vo Allnä gha hed. Dägägä isch ds Morächopfässä, Selfie midm Satish undm abäspülä midämä guätä Tropfä Wii im Clovers ja grad äs Zuckerchläckä, bzw ä scharfi oder aber au ä bitteri Aglägäheit gsi. Ds imitiärä vodä Happy-Meal-Abholig im Emmendingen-Style hed de nid ganz bi Allnä klapped, da ä Respäktsperson bewisä hed dasser au nur ä Mänsch isch und fahrlässig handlä cha 😉 Ganz ahständig ischs im Sänn unnä zuä und här gangä wo sich diä kunterbuntä Gruppänä uftürmt hend. Ganz am Schluss hend sich de widdr all Gruppänä am letschtä Poschtä, am Ehemaligä-Träff im 16ni iigfundä. So hed sich au diä letschti Frag klärt, wieso dass mehr scho adä GV sich zwüschä Wurscht und Schteiik entscheidä hed müässä.

So isch de offizielli Teil nachämä feinä Imbiss mit gmüätlichm z`ämähöcklä z`Änd gangä. Diä bunti Schaar hed sich de nach und nach ufglöst. Äs aständigs Tschumpäli aber isch de gschlossä am Majitscher sii Burtseltag gu voorfiirä im Latino. Im Verlauf vom Abig hend sich de widder immer meh und meh Gnomä adä Chloschter Chilbi gfundä, so dass de pünktlich am 12 mid gnuäg Tequila uf 25 Jahr Büäbl vom 16ni ahgstossä wordä isch.

Viär Gruppä sinds gsi, Viär grossi Dankä wemer ussprächä. Eis fürs Nelly fürs mitmachä und usfragä, eis am Satish fürs Fotimodäll stah, eis am Adi fürs organisiärä vom Znacht und d`Iiiladig und eis a alli Gnominnä und Gnomä wo so zahlriich erschinä sind.

Tis und Stössel