Widermal Samstig, am Wucheend hedmer ja bekanntlich s’Hirni nid so binenand und drum isch us viertelvor 1 au plötzlich 13:45 worde. Mit bitzeli Verspätig hemmers de doch no i Gerbi ine gschafft. Tja Ziit läse lernet halt nid all ide 2. Klass 😉
Gschminkt und ready fürd Abfahrt simmer denn alli gspannt im Car gsässe. In Begleitig vo üsem gröschte Fan hemmer üs ufe Weg gmacht. Im Car hemmer üse Hoffilmer no mitemene Geburtstagsgschänkli überrascht. Und sind guter Dinge richtig Menzikä gfahre.
Am Fescht aacho hemmer denn gad emal Kaffeestube in beschlag gnoh und öpis feins gässe. 😉 Anschiinend heig de Buuch am nächste Tag trotz hammerfeinem Esse rebelliert. Tja wer weiss a was, dass das gläge isch.
So, parad füre Umzug. No eis zwei Rundene mitm Kickboard mache und ab zu üsere Startposition. De Umzug hed spass gmacht und d’Wärmebüteli hend meh oder weniger au öpis gnützt. «Muesch nur ghörig schüttlä, du Lauch!»
Am 20ab 8ti hemmer denn au scho ah üse Uuftritt döffe. Läck isch das chalt gsii. Aber je chälter desto Chäs und de Uuftritt isch absolut cool (haha) gsii.
Am 12 hemmer gad zwei Geburtstagschind döffe befiire. Ob ide Halle oder ide Kaffeestubä mit de eigete Ländlerkappelle.
Also eis muessi säge: Fest hemmer uf jedefall gha bi üch liebi Menzikus. Aber Geld wechsle… hmmm da mömmer nomal drüber rede. 50.- nei 20.- also wievill isch jetzt genau 60-40 😉 Dank de kulante Bardame hend de au no die ärmste vo üs öpis zdrinkä übercho.
Aber so plötzlich wie mer cho sind, simmer denn nah au gange.
Mier gratuliered nomal herzlich zum Jubi.
Aber jetzt liebi Gnomäfründe, tschüss bis niemeh Brini
