Huch…scho wider änetem See. 😀 Die Fester sind immer die gfährlichste.
De Samstig hed für üs früeh aagfange. Am 1 hemmer scho dörfe parad sii zum Schminkä. Die ersti Station vom Tag isch s’Mythencenter gsii. Wie jedes Jahr hemmer wider dörfe a 3 verschidene Standort üses Besti gäh. Usserdem hemmer wie jedes Jahr wider bim Fasnachtsverkaufsstand verbii gluegt und de eint oder anderi Mist iikauft. 😎
Denn hets scho glii gheisse ab i Car und lets fetz Buochs. So en straffe Ziitplan hemmer scho lang nümm gha… ide Kaffeestube gits zNacht hends gseid. Aber dases erst am PUNKT 6i gschöpft wird und mier am halbi 7ni wider mönd parad stah, das isch de scho chli happig. 😉 Aber schlussendlich hemmer de alli öpis übercho und au de Major hed wider chli meh Farb im Gsicht gha. Nachem Platzkonzert simmer denn «zrugg» ufs Areal. Also es isch ja scho recht chlii gsii… aber es isch 8ti und das huere Festzellt isch volle gsii. Das chönnd au nur d‘Reyssecklär 😉 (danke für d’Amerkig) Drum chömemer so gäre uf die Siite vom See. Im Festzelt ischs abgange mitm DJ DOMEYNI… und dusse uf de Bühni wär en Gnom am liebste gstorbä. Aber im Verlauf vom Abig hed au der (die) de Rank wider gfunde und hätt schlussändlich am liebste gar nümm hei welle. De Uuftritt uf de Ussebühni isch echt geil gsii. So es Publikum hemmer scho lang nümm gha und es hed richtig Spass gmacht.
So, Uuftritt dure Kreis mache chli singe… «…längmer a Banane…» , ooooooh, neineineinei.. Wenn gömmer hei? Natürlich nid am zwei… uuuund ab as Fest. Kaffeestube läuft, Zelt läuft und was isch das da hinne en Container uf Bei… jajaj läuft au. S’Einzig ide Shotbar wird eim chli anderst. Aber au das hemmer überläbt. Zum fäschte hemmer lang deziit gha. Gwüssni Mitglieder sind richtig us sich usecho…oder so. Mer hend tänzled, gjodled, gsungä und mit verschidenste Gägeständ Musig gmacht. Im Grosse und Ganze eich en glungnä Abig. Leider isches de doch gliiner 3 gsii alsmer dänkt hend und au die unentschlossnä sind denn schlussendlich mitm Car «hei» oder wiiter, Hans was Heiri.
Am Sunntig hend sich denn hoffentlich alli wider chönne erhole und am Einehalbmeter isch au wider guet gange…
I dem Sinn…tschüss bis niemeh üches Brini 😀
