Chäch motiviert und mitme riese Strahle über die spitzä Ohre simer id Fasnacht 2014 gstartet! ..ok, sägemer Vorfasnacht, de Rott zlieb..! Und es isch scho sehr schnell seeehr heiss zueh und härgange, nämli bim Schminke neu im Chrüz! D`Edith het mäni ä tüüfi Stromrächnig, dass sie üs so igfüüred het.. und irgendwie wird dä Gerbi halt glich chli vermisst! Nun ja, grüen & roti Grinde hets glich gäh und so simer mit üsem Lieblings Carchauffeur ufbroche richtig Tschiffelers (oder wiemer das au immer schribt..): Dä SchränzerBall in Sarne het üs aglacht! Natürli nid ohni Ehrerundi bis Steibisser`s Chreisel; eimal, zweimal, ja sogar drüümal hemer umemöge! Ein HOCH auf unser Buschauffeur Armin!! Schöön isch gsi i alte & nüüä Ziite zschwänke; wiedermal s`Breakfast lose & de Trübäl chönds au scho..und so hend au Gnomä denn is Gschehe igriffe! Nervös es Thema!? Üsä Major het nid mal welle go es Schnäpsli zwicke..guet s`Möni isch ja eh viel «schärfer» druf gsi! Au süsch isch allerhand bote worde u.a. mitem SRF DRS 3 Black Music Special with DJ black Djangoo in the mix! Flätt a Decki klopfed het dä Mario bis dr DJ suubere Rock gspielt het! Dr Achermaa isch am «chotze» und dä Schilter niit em s`Mundstück usem Seckäl! Itritt isch ab 16i gsi und sowieso hets no Iiisgnomä umegha.. Alles i allem ä rächt passable Start gsi, au dä 2. Uftritt am 01.00 vorere gfüllte Halle mit Wissä zum abchüelä währedem blase! Suuuber gsi! Ganz verreckt isch au d`Heifahrt gsi..gschnupft worde was das Nasenloch hergab, gsunge was d`Stimmbänder no vertlittä hend, gsexned worde à la SexPresi und dichtet het au no eine «welle»! Hier Pipo`s Favoriten-Schmankerl: «Scheisse in der Seifenschale – Holadiladio – Gibt beim Waschen Muttermale – Holadiladio!» Eine nachem andere het de dä Car verlah..Wendelstube, Ingebohler Chilbi, ja sogar dä Hau de Schniider hend no so 4 Pickti ufem BusBahnhof vo sich gäh..zwar nid i Einer-Kolonne, aber es het mal no «tönt»! Adee GuetNacht!
S`Wichtigst aber isch, dass dä Hans schnell wieder uf «Bei» chund!..süsch schribt de Spital Schwyz schnell roti Zahle bi dem Whisky-Verschleiss! GUETI BESSERIG!!!
