«Wir sind so fromme Menschen auf der Welt, jajaa!» Die Fasnachtshaupttage im Feckerdorf haben begonnen!
Pünktlich um 05.00 Uhr sind ä zämägwürfletä Huufä mit nid ganz chline Ohre go feckerä..go feckerä heisst s`Dorf weckä, musiziere, saufn, schmatzn, dumm schnorre und eifach ä gueti Ziit zämä verbringe! Die einte sind direkt vo Brunne cho, ander sind vor luuter Vorfreud am Morge am eis go Schneeschuuflä, wieder ander sind scho zlang debi, als dass sie sich würded vo so Faxxe lah verruckt mache. Hauptsach es het pünktlich «tätscht»! ..und zwar gröööber, d`Fahnestange uf de Muotabrügg het sini Spure devotreid und es paar Verschüpfti hend sich sicher gseid: «Noch einen Sotigen!»
..s`Gliche het sich wohl oder übel au de Petrus gseid und het d`Flöckli reihenweise lah tanze! So fescht, dass sich s`Abschminke am Abig fascht erübrigt het bzw. dass s`Nacheschminke zur Pflicht worde isch..oder wotsch du dem no öpis zuefüegä Dave?
Ja Letzterer het au defür gsorgt, dases ide Schminkkabine gfähneled het! Apropos Ländlerkabinä, mit lüpfigem Sound vom DJ wissä Strich und ere schmackhafte Uswahl a Pulitzer-Kaffee, isch d`Stimmig bereits bim Schminke TOP gsi!
S`erschte Bier bi de Muota Garage isch nonig so ring abe..aber nachem Zmorgä im Altersheim und de Marathonroute im wilden Schneetreiben dure Grossstei (hets no chli ghudlät, zum Glück isch pflueget gsi..), simer wohl ufghobe und empfange worde: «Wer nid gumped, isch kei Strüby!» 80-Prozentigs hets gäh und somit isch de Gang zum Gallerä via Laimgass mit links gnoh worde. Zmittag ide Rose (Piccata – gut bis sehr gut), s`alljährlich traditionelle Muotaland im Altersheim und Kinderbeschärig vor de Chilä, sind wiiteri «Schmankerl» vom demjährige SchmuDo gsi! Im Center hemer de no äntgültig d`Lippe «gschlissä» und sind denn alli müed ide Bei, aber wach im Kopfe, i alli Himmelsrichtige devoghöselet..
..aber wies halt eifach Tatsach isch, kei verreckti Fasnacht ohni Gnomä! ..und so ischmer anenand, u.a. im Chrüz bi de Schissäli-Paupeler, z`Brunne ufem Gmeindsparkplatz oder d`Schwyz am Haaruus, wieder über de Wäg gloffe.
Und da dä offizielli Teil ja bereits abgschlosse worde isch, wird uf das grossi Thema umä Scharri-Priis hie au nid wiiter ihgange (Namen & Fakten der Redaktion bekannt)!
«Mier sägäd DANKESCHÖN, mier säged DANKESCHÖÖÖN» allne Kaffeegönner, wo üs all Jahr unterstützed, heged und pfleged! Bis am 27. Februar 2014!
